DAYNA KURTZ

Ás veces, resúltame estrano este mundo da música. Non podo entender porque certos artistas venden discos coma churros e outros non pasan de ser meras figuras de culto ou xenios descoñecidos para unha amplísima maioría. Este é o caso de Dayna Kurtz, unha das mellores voces do panorama internacional, cun puñado de marabillosas cancións. Claro que esta muller representa o lado crítico de norteamérica, ese que non interesa que saia á luz e que se oculta debaixo da alfombra.
A súa voz lémbrame a divas da talla de Nina Simone, Joni Mitchell ou Bessie Smith, pero ademais as letras teñen un sabor a Tom Waits ou a Marianne Faithful e se a eso lle unides o lirismo de Leonard Cohen, o ritmo do primeiro Van Morrison ou a forza de Patty Smith, estamos diante dunha artista coma a copa dun pino.

Para os que non a coñecíades, aquí vos deixo unha das cancións do álbum "Postcards from Downtown" (2002): Love gets in the way
Espero que vos guste

TISTA

PRESENTACIÓN

Hi everybody !
Este blog nace para compracer a uns cantos amigos "pesados" que levan tempo coméndome a olla para que faga un blog musical.

"A cova de Juan Rei" é un lugar marabilloso sito na praia da Cambra en Palmeira. Alí nos xuntabamos para elaborar a nosa estratexia nas guerras fraticidas contra os do Porto ou contra os bárbaros do Norte (Algunha pedrada teño levado de máis de algún lector deste blog,;)). Pero tamén era o lugar onde nos xuntabamos para botar unha pachanga na praia, ou para escoitar música. Cada quen traía unha cassette e así algúns de nós descubrimos a Genesis ou a Pink Floyd, e alí empezamos a escoitar un programa mítico para os da nosa xeneración: Musical Cassette en Radio Popular de Vigo.

Pretendo que neste blog atopedes un espazo para o reposo e para disfrutar da música con voces que ás veces serán cálidas, outras veces descarnadas e intentarei algunha que outra vez sorprendervos con algunha desas cousas raras que xa sabedes que me gustan tanto e coas que vos dou a vara de tarde en tarde.

O que non quero é facer un blog que esté pendente de etiquetas, aquí van ter cabida todo tipo de sons e de estilos: do Jazz ao pop, da bossa nova ao flamenco ou do soul ao country. O que me pida o corpo nese momento. Non trato de reclutar a fieis de un ou outro movemento, o que trato é que isto se convirta nun punto de reunión para persoas sen perxuizos que simplemente queiran escoitar un puñado de boas cancións .
Benvidos á nosa cova, benvidos á vosa casa